ನಸುಕಿನೊಳಗಿನ ಮುಸುಕು...

ಏನೂ ಬರೆಯಬಾರದು ಎಂದುಕೊಂಡ ಹಾಗೆಯೇ
ಒಳ್ಳೆಯ ನಿದ್ರೆಯಲ್ಲೇ
ಜಾಗರಣೆಯಿರದ ಶಿವರಾತ್ರಿ
ಕಳೆದು
ಕಳೆದುಹೋಗಲಿ ಬೇಗ
ಇನ್ನೆರಡು ದಿನ
ನೆನಪಿಸಿಕೊಳ್ಳುವುದಕ್ಕೆ
ಹದಿನಾಲ್ಕನೆಯ ದಿನವೇ ಬೇಕೆ?
ಪಟ್ಟು ನಿರ್ಧಾರ ಮಾಡಿದ್ದಷ್ಟೇ ನಿನ್ನೆಯವರೆಗೆ

ಈಗ ಇಷ್ಟು ಹೇಳಲೇಬೇಕೆನಿಸಿದೆ
ಇದು
ಈ ಕ್ಷಣದ ನಿರ್ಧಾರ
ಇವತ್ತಿಗಾಗಿ ಏನಾದರೂ ಹೇಳಲೇಬೇಕು
ನೀನು ಇವಿಷ್ಟನ್ನೂ ಓದುವ ಮೊದಲೇ
ಪಬ್ಲಿಶ್ ಮಾಡುತ್ತಿದ್ದೇನೆ
ಹೇಳಲಾ...
ಹೇಳಿಬಿಡಲಾ...
ವೀಕೆಂಡುಗಳಲ್ಲಿ ಬೆಳಗಿನಜಾವ
ನನ್ನೊಬ್ಬಳನ್ನೇ ಬಿಟ್ಟು
ನೀನು ಹೈಕಿಂಗ್ ಹೋದಾಗ
ಮನೆಯಲ್ಲಿ
ಬೆಳಗಿನಜಾವದ ನಿದ್ರೆ
ನಿದ್ರೆಯಾಗಿರದೇ
ಬೆಳಗಿನ ಜಾವದ ಎಚ್ಚರ ಎನ್ನಿಸುತ್ತದೆ ಕಣೋ...

ನಸುಕಿನಲ್ಲಿ
ಆ ರೂಮಿನಲ್ಲಿರುವ
ಆ ನಿನ್ನ ಮಗನಿಗೆ
ಎಚ್ಚರಾಗದ ಹಾಗೆ
ನನ್ನ ಕಿವಿಯೊಳಗೆ
‘ಬಾಯ್’ ಎಂದು
ಪಿಸುಗುಟ್ಟಿ
ನಸುಕಿನಲ್ಲಿ ನೀ ಮಸುಕಾಗಿ ಮರೆಯಾದರೆ
ಸುಮ್ಮನೆ ಮುಸುಕಿನೊಳಗೆ
ಮೂಗು ಮಾತ್ರ ಹೊರಗೆ
ಕಣ್ಣು
ನಿನ್ನಹಿಂದೆಯೇ ಅರಸಿ ಹೊರಟಿರುತ್ತದೆ

ನೀ ಮರಳಿದಾಗ
ನಾನು ನಿದ್ರಿಸುತ್ತಿರುತ್ತೇನೆ
ಅಂತ ನೀ ಅಂದುಕೊಂಡಿದ್ದು
ನಿಜದ ನಟನೆ
ಸ್ವತಃ ನಾನೇ ನಟಿಸುವ ನಟನೆ
ನೀ ಬಂದು ನಿದ್ದೆಯಿಂದೇಳಿಸುವ
ಸೀನು ನನಗಿಷ್ಟ
ಎಂಬೊಂದೇ ಕಾರಣಕ್ಕೆ

ಯಾವತ್ತೋ ಹೇಳಬೇಕಿದ್ದ ಮಾತು
ಹೇಳಲಾ...
ಹೇಳಿಬಿಡಲಾ...
ಪ್ಲೀಸ್...
ಇನ್ನುಮುಂದೆ ನಿನ್ನ ಜತೆ
ನಾನೂ ಬರಲಾ?